Июнĕн 7-мĕшĕнче Шупашкар районĕнчи Чурачăк халăхĕ пысăк пĕлтерĕшлĕ тĕл пулăва пухăнчĕ. Кунта Чăваш Республикинчи виҫĕ районти Чурачăк ялĕсем тĕл пулчĕҫ: Çĕрпӳ, Комсомольски тата Шупашкар районĕнчи Чурачăксем. Ваттисен йăлипе, ăшă кăмăлпа, пĕтĕм чĕре ăшшине парнелесе эпир хăнасене ҫăкăр-тăварпа, чăваш сăрипе, юрă-ташăпа кĕтсе илтĕмĕр. Ку тĕл пулу пĕрремĕш мар. 2016 –мĕш ҫулта Комсомольски районĕнче Чурачăксем пухăннă. 2017 – мĕш ҫулта Çĕрпÿ районĕнче тĕл пулу иртнĕ. Çак тĕл пулусене пуҫараканĕ - Анатолий Николаевич Федоров, Çĕрпÿ районĕнчи Чурачăкран.
Хăнасене Чурачăк халăхĕ ҫул юппинче кĕтсе илнĕ. Ахальтен мар ҫак вырăна суйласа илнĕ. Кунтан Шупашкар районĕнчи кашни ултă Чурачăк ялне те ҫитме пулать. Çул юппинче тĕл пулнă хыҫҫăн ОАО «Чурачикское» хуҫалăхра пулса курчĕҫ. Çÿренĕ май хуҫалăхри опытпа паллашрĕҫ. Хăнасене уйрăмах пĕчĕк пăрусен «ҫурчĕсем» килĕшрĕҫ. Унтан вĕсене Чурачăк шкулĕ кĕтсе илчĕ.
Шкул коридорĕнче алă ĕҫĕсен куравне йĕркеленĕ. Хăнасем кунта хамăр тăрăхри ÿнерҫĕсен ĕҫĕсемпе паллашрĕҫ, ялсенчи алă-ĕҫ ăстисен илемлĕ ĕҫĕсене пăхса савăнчĕҫ. Шкул ачисем хăнасене сцена ҫинче кĕтсе илчĕҫ, хăйсен пултарулăхне кăтартрĕҫ. Шкул директорĕ Павлова А.К. шкул пурнăҫĕ ҫинчен тата хамăр Чурачăк ялĕсен историне кĕскен класса пачĕ. Унтан Çĕрпÿ тата Комсомольски Чурачăкĕсем хăйсен пурнăҫĕпе паллаштарчĕҫ. Çĕрпÿ Чурачăк чиркĕвĕн пачăшки Александр атте икконăсем парнелерĕ. Çак тĕл пулу символĕ те ҫуралчĕ. Ǎна Шамбина Л.К. тĕрлесе хатĕрленĕ.
Симĕс уҫланкăри ҫавра сĕтел хушшинче кăҫалхи тĕл пулу вĕҫленчĕ. Малалла та пĕр-пĕринпе хутшăнса туслă пурăнасчĕ.